Nagin cent vul Paris trametter a Basilea. La regenza franzosa ha decidì da franar ad interim sia participaziun finanziala a l'access da viafier per l'Euroairport Basilea-Mulhouse. La raschun sajan custs da project creschids da var 475 milliuns euros sco era la situaziun da budget precara sin plaun naziunal e regiunal en Frantscha.
Malgrà ina cunvegna da finanziaziun tranter la Frantscha, la Svizra, la Germania ed ils partenaris regiunals da l'onn passà vegn il project mess sin glatsch. La Frantscha vul percunter cuntanscher ina participaziun da l'Uniun europeica per optimar ils custs.
Tuttina: Nus vulain mantegnair quest project.
Oriundamain eri planisà da cumenzar cun las lavurs da construcziun l'onn 2027, e l'avertura avess gì lieu la fin 2034 u 2035. In nov urari n'è betg avant maun. Suenter ils svilups ils pli novs è l'entir project ussa intschert. Per Thibaud Philipps, il responsabel per il traffic da viafier en la regiun Grand Est, è la decisiun da Paris vegnida pauc surprendenta: «En vista a la situaziun dal preventiv èsi stà da prevair retards. Tuttina vulain nus mantegnair il project.»
Gronda dischillusiun a l'eroport
L'Euroairport è surprais e dischillusiunà da la decisiun da Paris. En in scriver envers SRF punctuescha la plazza aviatica ch'ins sa stentia da far avanzar la decarbonisaziun da l'arrivada e da la partenza da passagiers e da las collavuraturas e dals collavuraturs. La colliaziun da viafier saja centrala per quai.
Per la regiun è la colliaziun da viafier cun l'Euroairport enorm impurtanta.
Er il chantun Basilea-Citad reagescha cun displaschair. Nicole Ryf, pledadra da medias dal Departament da construcziun e traffic, di: «Per la regiun è la colliaziun da viafier cun l'Euroairport enorm impurtanta. Igl è in project necessari, e nus stuain ussa guardar co ch'i po ir vinavant.»
Project central per la regiun
La colliaziun da viafier vala sco element impurtant per l'engrondiment da la viafier d'aglomeraziun trinaziunala da Basilea. Cun ina colliaziun directa pudessan passa 6'000 lavurantas e lavurants – sco era numerus passagiers da la Svizra dal nordvest, da l'Alsazia e da la part dal sid da Baden – arrivar a l'eroport a moda cumadaivla ed ecologica, quai senza midar tren e senza temp da spetga.
Thomas Noack, il president da l'IG ÖV Nordwestschweiz, punctuescha: «L'amplificaziun dal traject da tren fiss ordvart impurtanta per la regiun. Ella porscha ina colliaziun directa da l'eroport a la staziun da las Viafiers federalas e plinavant fin a Liestal e Mulhouse.»
Er Emanuel Barth, il manader da la viafier trinaziunala TriReno, è surprais dal mument da la retratga: «Nus avain ina buna enclegientscha cun ils partenaris da project. Mo la finanziaziun è adina stada resalvada – ussa stuain nus contractar da nov.»
Il futur dal project è avert
Malgrà la rebattida resta la speranza da cuntinuar il project. Il traject planisà, da 6 kilometers lunghezza, na colliass betg mo l'eroport, mabain augmentass era considerablamain la capacitad da la lingia da viafier Basilea–Mulhouse. «Il project rinforzass la rait da viafier e purtass avantatgs per tut las utilisadras ed ils utilisaders», di Barth. La dumonda saja ussa, sut tge cundiziuns ed en tge spazi da temp ch'il project possia vegnir cuntinuà.