Il Cussegl dals chantuns ha approvà il glindesdi cleramain ina moziun correspundenta dal cusseglier da la PLD grischuna Martin Schmid. El ha argumentà sia moziun cun la stgarsezza d’abitaziuns primaras en regiuns turisticas. Quella fetschia grev per gestiunaris da hotels cun possessurs da l’exteriur da chattar avunda collavuraturas e collavuraturs.
Cunter la moziun da Schmid è s’exprimida la cussegliera federala Elisabeth Baume-Schneider. Quella cuntrafetschia a la finamira da la Lex Koller da proteger il terren svizzer – e pussibilitass a persunas da l’exteriur da cumprar abitaziuns sco investiziun da chapital. Sco proxim s’occupa il Cussegl naziunal da la moziun.
Pli baud pratica en il Grischun
Il chantun Grischun aveva adina puspè dà permiss per abitaziuns da persunal, era per persunas da l’exteriur. Ina sentenzia dal Tribunal federal ha però fatg cler – che questa pratica cuntrafa la lescha. Uss vul Martin Schmid puspè pussibilitar quai, cun adattar l'ordinaziun e la lescha correspundenta.
Ch'i duai esser pussaivel da construir abitaziuns da persunal, da quest avis è era la cussegliera naziunala da Turitg Jacqueline Badran. Dentant per la socialdemocrata n'è la via che Martin Schmid vul ir betg la gista. Ed i saja er in pau in tric per betg stuair s'exponer ad in referendum. Tenor Badran avess la proposta da Schmid la consequenza, ch'ils pretschs per ils objects vegnissan anc ina giada pli chars. Uschia daventassi impussibel per persunas da la Svizra da cumprar hotels.
Il problem en chaussa è tenor Jacqueline Badran pli profund, cumenzà haja cun desister d'integrar ils hotels en la Lex Koller. Questa lescha duai proteger il terren svizzer, cun procurar che quel na vegnia betg vendì a persunas en l'exteriur. Cun midar la lescha saja daventà pussaivel che persunas estras pon cumprar sistematicamain hotels en Svizra. Badran vul che questa midada vegnia abolida, ed uschia pudess ins decider da cas a cas sch’ins vul dar ina lubientscha per cumprar e construir objects per il turissem. In bun exempel saja Andermatt cun l'investider Samih Sawiris. Cun in tal sistem pudessian ins era proteger ils objects da persunas da l’exteriur, che vulan simplamain deponer lur daners en Svizra.
Er il Cussegl federal argumentescha sumegliant a Jacqueline Badran. Per Martin Schmid va questa argumentaziun memia lunsch, e na tutga betg il problem. Cun sia soluziun pudess la Svizra numnadamain far vegnir pli attractivas las plazzas da lavur en l’hotellaria.
