Ils emprims sis mais da quest onn han ils hotels en Svizra nudà 11,4 milliuns pernottaziuns. Cumpareglià cun la medema perioda dal 2019, è quai in regress da var 40%. Cunzunt ils giasts da l'ester mancan. Vitiers vegnian las sfidas da chattar persunal.
Sa concentrar sin citads
Quants daners che sajan necessaris per puspè dar in stausch a la branscha, vegnia discutà a partir da mez avust, ha ditg Züllig.
Segir è che las citads vegnan ad esser nossa prioritad, per sustegnair la nova posiziun da quellas.
Là vesa Züllig grond potenzial, sur tut tar la purschida per il temp liber. Las citads hajan uss ina buna schanza da sa posiziunar da nov e per chattar ina buna relaziun tranter clientella da fatschenta e dal temp liber.
Natiralmain dettia er en regiuns muntagnardas il basegn da recuperar. La dumonda saja dentant sin tge ch'ins veglia sa concentrar, perquai ch'ils meds sajan limitads ed ins veglia ina schliaziun coordinada per l'entir sectur.
Mancanza da persunal
Abstrahà da problems finanzials che la pandemia ha anc pegiurà, è la branscha er confruntada cun ina mancanza da persunal. Quai vegnia a fatschentar la branscha pli ferm che la digitalisaziun e la pandemia. Per cumbatter la mancanza da persunal stoppia la branscha tenor Züllig per exempel porscher ina scolaziun per persunas che vegnan d'ina autra branscha. Els stoppian dentant er sviluppar novs models da lavur e porscher plazzas parzialas.
