En Svizra duai dar dapli e pli favuraivlas abitaziuns. Quai pretenda il cusseglier federal Guy Parmelin. Ensemen cun l’Uffizi federal d’abitaziuns examineschia el actualmain diversas mesiras, per exempel pertutgant il dretg da locaziun e davart la planisaziun dal territori. Quai scriva la «SonntagsZeitung».
Quai ha consequenzas
Parmelin haja avertì ch’ina purschida d’abitaziuns insuffizienta restrenschia il svilup economic. En pli pudessi dar tensiuns sociopoliticas. Perquai saja necessari d’optimar las cundiziuns da basa. Tenor il minister da l’economia dovri mintg’onn radund 50'000 abitaziuns novas. Il 2021 sajan dentant mo 46'000 abitaziuns vegnidas construidas. Tenor prognosas sajan quai stadas l’onn passà anc pli pauc. Actualmain èn be 1,3% da las abitaziuns vidas. E quest trend cuntinuescha.
