Il problem principal per pudair decider davart il fond era quant spazi ch'i possia dar tar la summa da la taglia sin petroli che duai vegnir investida. Il Cussegl naziunal ha ussa surprendì la proposta dal Cussegl dals chantuns. Il NAF duai survegnir «per regla» 10% da las entradas da la taglia sin petroli.
Era tar il segund punct è il Cussegl dals chantuns sa mess tras. Il Cussegl federal duai avair la pussaivladad da gulivar las tariffas da la taglia sin petroli a la chareschia. La fatschenta è uschia pronta per la votaziun finala. Il pled final ha dentant il suveran.
Ina finanziaziun suffizienta
Il Cussegl federal aveva proponì in nov fond, per garantir a lunga vista avunda daners per las vias, sumegeliant sco per la viafier. Ils meds finanzials ch'èn oz avant maun tanschian gist per il mantegniment da las vias, dentant betg pli per finir la rait da vias naziunalas. Uschia possia dar ina lucca da passa ina milliarda francs ad onn.
Per pudair garantir ch'il fond haja avunda finanzas, duain novas funtaunas d'entrada vegnir avridas. La taglia sin petroli duai ord quai motiv vegnir auzada da 30 sin 34 raps. Las entradas supplementaras fissan uschia tar 200 milliuns francs. Ultra da quai culan era las entradas da las vignettas da l'autostrada en quest fond. Quai èn 320 milliuns francs. Las taglias d'import sin autos da 375 milliuns francs e davent dal 2020 era ina nova taglia per ils autos a motor electric.
RR novitads 09:00
