L'offensiva solara è er en moviment sin tetgs e mirs da chasadas. Interpresas che vulessan gugent installar in indriz, n'han dentant betg ils meds finanzials, pon dumandar per sustegn tar l'Agid Svizzer per la Muntogna ASM.
Sco il schurnal regiunal da SRF rapporta, marscha en il mument in'acziun da ramassar donaziuns per quai. I saja pli grev che uschiglio da ramassar daners, di Ivo Torielli da l'ASM envers SRF. Quai haja tenor Torielli da far probablamain cun ina tscherta stanclezza en la Svizra tge che pertutga donaziuns. Ina da las raschuns saja per exempel la chareschia u las autas premias da cassas da malsauns.
L'ASM haja gia sustegnì 280 projects da solar ed ha mess a disposiziun per quai en total 8,3 milliuns francs. Uschè bler na saja betg vegnids rimnà enfin uss. Era sche l'actuala campagna da ramassar saja finida, veglia l'ASM vinavant prender encunter donaziuns. Las donaziuns vegnan cunzunt fatgas da glieud en la Bassa, di Torielli.
Duas finamiras da l'agid
I dettia duas finamiras che quai agid duai ademplir. Per l'ina possian puras e purs, dentant er ustarias en la muntogna ch'han da bun l'agid, sbassar lur custs cun ils indrizs solars. Per l'autra possian ellas ed els er contribuir a la midada d'energia en Svizra.
L'emna passada ha l'ASM er annunzià, ch'el sustegnia da nov er l'installaziun da WLAN en manaschis ed ustarias en la muntogna.