Grond interess per il program solar da l'Agid svizzer per la muntogna. Dapi la fin d'avrigl, cura che quel ha cumenzà, haja la fundaziun segirà a passa 180 projects in sustegn dad en tut tschintg milliuns francs. Quai scriva l'Agid svizzer per la muntogna. Cun quest program rinforza ella ses engaschament per construir implants solars sin edifizis d'interpresas pitschnas en las regiuns da muntogna. Quellas profiteschan uschia da pretschs d'energia pli bass e gidan durant l'enviern, cun furnir energia en la rait, a dumagnar la midada energetica.
Blers dals projects inoltrads sajan gia stads planisads, ma ils custs eran anc memia auts. Cun il sustegn hajan quels projects uss finalmain pudì vegnir realisads. Il program sustegna be implants solars che vegnan installads sin edifizis existents. Ultra da quai sto l'energia producida er vegnir nizzegiada en l'interpresa.
Las interpresas ston esser en ina zona da muntogna, na dastgan betg avair dapli che 49 plazzas cumplainas e ston esser manadas da l'economia privata. Lura po la fundaziun sustegnair implants solars cun fin a 50% dals custs.
