Cun bajetgs da minergia e nizzegiar l'entir tetg per indrizs solars pudess vegnir cuntanschà la finamira da la cunvegna dal clima da Paris. Quai resulta d'in studi da PlusEnergieBau PEB che ha preschentà avant las medias la pli gronda ovra solara da la Svizra. Fin en 10 onns pudess'ins remplazzar radund 100 uras terrawatt energia ad onn e fin il 2050 radund 280 uras terrawatt ad onn e quai senza restrenscher auals e flums ed er senza duvrar terren. Uschia hai num en il studi.
Enstagl da transferir en l'exteriur passa 170 milliardas francs per imports d'energia fossila e nucleara, sco ils ultims 25 onns, fiss d'investir en indrizs solars sin ils bajetgs.
Questas investiziuns en ils bajetgs purtassen en 25 onns in respargn da 100 milliardas francs ed entradas da 75 milliardas francs, uschia scrivan ils auturs dal studi. Vitiers pudess la dependenza d'energia da l'ester (75% deriva da l'exteriur) vegnir midada en 24 fin 55 onns en ina independenza d'energia.
RR novitads 14:00