Il constructur da maschinas da Winterthur Sulzer ha preschentà sias cifras da l'onn 2022. Il gudogn è cun 28 milliuns francs marcantamain pli pitschen ch'anc 2021. I dat dentant pliras grondas midadas en quels onns.
2021 ha l'interpresa sa separà da si'interpresa Medmix. E l'onn 2022 ha l'interpresa chalà cun sias fatschentas en la Russia e la Pologna. Cunzunt la retratga da la Russia e la Pologna ha reducì il gudogn 2022 per 80%, sin 28 milliuns francs. L'onn passà ha l'interpresa anc fatg 140 milliuns francs gudogn.
In solid resultat, tenor l'interpresa
La svieuta è creschida cumpareglià cun il 2021 per 1,8%, e l'entrada d'incumbensas per 8,1%. La CEO Suzanne Thoma di che quai resultat mussia la stabilitad da l'interpresa en in temp cun bler malsegirezza. Il resultat saja meglier che spetgà. Ulteriurs problems èn stadas las interrupziuns en la chadaina da furniziun e la serrada sfurzada da fabricas en la China pervia da la pandemia da corona.
Malgrà il gudogn pli pitschen duain ils acziunaris survegnir ina dividenda da 3 francs e miez per aczia. Per 2023 quinta l'interpresa da pudair crescher, cun dapli gudogn.
