Mintga um svizzer è – stan oz – obligà da far in servetsch civil u da militar. Obligadas èn tenor il Departament federal da defensiun VBS, radund 35'000 persunas l'onn. Il servetsch haja la funcziun principala da porscher persunal en connex cun la segirtad da la Svizra.
Era dunnas duain far in servetsch
L'iniziativa «service-citoyen» vul per l'ina, ch'era dunnas ston en l'avegnir far in servetsch. Per l'autra duai er esser pussibel da far il servetsch ordaifer l'armada u protecziun civila, per exempel per la protecziun d'ambient, la tgira, l'educaziun u l'agricultura. Uschia vul l'iniziativà scumpartir la responsabladad a moda eguala e procurar per ina Svizra ferma en temps da crisas. Tenor las cifras dad oz, quint'ins cun 70'000 persunas l'onn, che fissan obligadas da far in servetsch. Ina schanza per ina Svizra en temps da crisas, di Noémie Roten, presidenta dal comitè d'iniziativa. Ed ina schanza per las dunnas.
In service citoyen porscha per dunnas la schanza sin scolaziuns e raits socialas
Per il Cussegl federal ed il parlament, che refusan l'iniziativa è il servetsch per las dunnas in dals arguments cunter il «service-citoyen». Las dunnas fetschian anc adina la gronda part da la lavur betg pajada da tgira, educaziun ed en il tegnair chasa. Era sche l'egualitad e dapli dunnas sajan ina finamira concreta da l'armada saja anc memia baud per in servetsch obligatoric per dunnas.
Perquai che l'egualitad da la dunna en professiun e societad n'è anc betg cuntanschida, va l'iniziativa en la faussa direcziun.
En pli na possian ins betg be quintar cun dapli persunas che fan il servetsch, ins stoppia era stgaffir novas plazzas be per administrar ils novs servetschs, di il minister da defensiun e cusseglier federal Martin Pfister. Dapli persunas obligadas per in servezzan mancassan tar lur plazzas da lavur ed i fissan memia bleras persunas en servezzan, che quai ch'igl è necessari per la segirtad da la Svizra. L'iniziativa, argumentescha Martin Pfister, chaschunass in grond augment da custs tar chantun, Confederaziun e na l'ultim affars. La summa per la cumpensaziun dal gudogn (800 milliuns) e la segiranza da militar (160 milliuns) sa dubless sin passa 1,9 milliardas francs l'onn.
Na l'ultim argumenteschan regenza e parlament cun il dretg public. Entaifer quel prevesa il scumond da lavur sfurzada che persunas possian – cun paucas excepziuns – be vegnir sfurzadas per servetschs militars u da protecziun civila. Cun l'iniziativa vegnissan dentant probabel dapli che la mesadad dals servetschs fatgs dador l'armada e la protecziun civila. Ins tema che persunas che faschessan servetschs betg plausibels, vulnerassan il scumond da lavur sfurzada.
L'ultim pled en il chapitel ha la populaziun svizra. Ils 30. da november vegni decis a l'urna.