Mintga um svizzer è – stan oz – obligà da far in servetsch civil u da militar. Obligadas èn tenor il Departament federal da defensiun VBS, radund 35'000 persunas l'onn. Il servetsch haja la funcziun principala da porscher persunal en connex cun la segirtad da la Svizra.
Era dunnas duain far in servetsch
L'iniziativa «service-citoyen» vul per l'ina, ch'era dunnas ston en l'avegnir far in servetsch. Per l'autra duai er esser pussibel da far il servetsch ordaifer l'armada u protecziun civila, per exempel per la protecziun d'ambient. Tenor las cifras dad oz, quintass il Cussegl federal cun 70'000 persunas l'onn, che fissan obligadas da far in servetsch.
Tenor il cusseglier federal, Martin Pfister, na possian ins betg be quintar cun dapli persunas. Surtut stoppian ins quintar da stgaffir novas plazzas be per administrar ils novs servetschs.
Per realisar l'iniziativa stuess ins administrar e controllar ina pluna novas plazzas da servetschs.
En pli mancassan dapli persunas obligadas tar lur plazzas da lavur ed i fissan memia bleras persunas che quai ch'igl è necessari per la segirtad da la Svizra. L'iniziativa, argumentescha il Cussegl federal ed il parlament, chaschunass in grond augment da custs tar chantun, Confederaziun e na l'ultim affars.
Nagina egualitad vaira
Sper la finanziaziun haja era la dumonda da l’egualitad chaschunà grondas debattas en il Cussegl naziunal, resumescha Martin Pfister.
Perquai che l'egualitad da la dunna en professiun e societad n'è anc betg cuntanschida, va l'iniziativa en la faussa direcziun.
Las dunnas fetschian anc adina la gronda part da la lavur betg pajada da tgira, educaziun ed en il tegnairchasa. Era sche l'egualitad e dapli dunnas sajan ina finamira concreta da l'armada saja anc memia baud per in servetsch obligatoric per dunnas.
Na l'ultim argumenteschan regenza e parlament cun il dretg public. Entaifer quel prevesa il scumond da lavur sfurzada che persunas possian – cun paucas excepziuns – be vegnir sfurzadas per servetschs militars u da protecziun civila. Cun l'iniziativa vegnissan dentant probabel dapli che la mesadad dals servetschs fatgs dador l'armada e la protecziun civila. Ins tema che persunas che faschessan servetschs betg plausibels, vulnerassan il scumond da lavur sfurzada.
L'ultim pled en il chapitel ha la populaziun svizra. Il november vegn decis a l'urna.