Quai resulta d'in nov studi da la Confederaziun ch'ella ha fatg davart auas grondas extremas. Tenor il studi vegnissan ils territoris da las ovras atomaras sco er quels dad autras infrastructuras criticas sut l'aua.
Raschun per questa analisa che la Confederaziun e l'Inspecturat federal per la segirezza nucleara ENSI han fatg, è stada la catastrofa nucleara dal 2011 a Fukushima en il Giapun. Là eran vegnidas libras grondas massas da material radioactiv pervi d'in tsunami.
Implants nuclears per part meters sut aua
En il cas extrem pudessan flessegiar passa 7'000 meters cubics aua per secunda da la sbuccada da l'Aara en il Rain, haja la simulaziun mussà. Ils responsabels per il studi hajan er calculà las consequenzas da ruschnadas, stuppadas tar punts entras laina da grava, erosiuns da la riva, rempars che rumpan ed er il desdir d'umans.
Tar in'inundaziun ch'i dat mo mintga 100'000 onns stessan las ovras atomaras Beznau e Gösgen er entras stuppadas da punts entras laina da grava, radund 1,1 meters sut l'aua. Er il territori da l'ovra atomara tschentada giu Mühleberg, stess radund in meter sut l'aua tar ina tala inundaziun.
Naginas mesiras urgentas necessarias
Per las ovras atomaras muntia quai che l'analisa mussia circa las medemas mesiras relevantas sco fin qua. Ils gestiunaris da las ovras atomaras, vegnian tuttina supplitgads d'adattar lur analisas da segirezza sin basa dal nov studi.
L'Uffizi federal per energia supplitgeschia er ils gestiunaris d'implants da serra da surlavurar lur concepts da segirezza tenor la nova analisa. Plinavant duain sumegliantas simulaziuns er vegnir fatgas tar auters territoris dasper flums gronds. Ils resultats duain lura vegnir dads vinavant a las autoritads responsablas. Senn è d'augmentar la segirezza da l'infrastructura critica en cas extrems.
