Siglir tar il cuntegn

Svizra «Jau n'hai betg fatg uschè mal mia lavur, pens jau»

La decisiun è crudada. La cussegliera federala grischuna ha decidì da betg candidar per in'ulteriura perioda d'uffizi.

Eveline Widmer-Schlumpf ha infurmà oz il president da l'Assemblea federala ch'ella na candideschia betg pli tar las elecziuns dals 9 da december, uschia ch'ella chala cun la fin da december.

A la conferenza da medias en chasa federala ha la cussegliera federala partenta engrazià a tut las collavuraturas ed als collavuraturs per la collavuraziun. Era sch'i saja stà temps intensivs cun il salvament da la banca UBS l'october 2008, cun far la nova strategia da finanzas.

Igl è in grond privilegi da lavurar per la publicitad. Jau ha fatg gugent quai. Questa lavur ha però era custà blera substanza.
Autur: Eveline Widmer-SchlumpfCussegliera federala partenta

La decisiun saja naschida en discussiuns e discurs cun la famiglia - ed haja da far nagut cun ils resultats da las elecziuns. Era las posiziuns da las partidas svizras - pia sche lezzas sustegnian ella per in'ulteriura perioda d'uffizi - na sajan betg stadas impurtantas per ella.

Suenter las elecziuns haja ella infurmà sia partida PBD ed avant in pèr dis insumma las partidas dal center.

La decisiun hai jau prendì glindesdi suenter las elecziuns, perquai ch'jau vulev tegnair libra la situaziun per la partida avant las elecziuns. La partida saveva però ch'jau ponderesch da demissiunar.
Autur: Eveline Widmer-SchlumpfCussegliera federala partenta

Ella saja persvadida che quai saja era bun per la Partida burgais-democratica (PBD), ha ditg Widmer-Schlumpf. La partida n'haja betg pudì far politica, perquai che ella sezza sco persuna saja adina stada en il center da las discussiuns. Uschia saja quai ina entschatta per la PBD e betg la fin.

.

Las reacziuns en ed or dal Grischun

.

La via dad Eveline Widmer-Schlumpf - la cronologia

.

.

L'elecziun - in terratrembel politic

Eveline Widmer-Schlumpf vegn saramentada
Legenda: Eveline Widmer-Schlumpf vegn saramentada avant il parlament federal. Keystone

Ils 12 da december 2007 ha il nov parlament da Berna elegì Eveline Widmer-Schlumpf sco nova cussegliera federala enstagl da confermar Christoph Blocher. Dad in mument sin tschel discurra l'entira Svizra da quest num pli pauc enconuschent sin il parchet politic: Eveline Widmer-Schlumpf. Il parlament ha elegì Widmer-Schlumpf cun 125 vuschs tar in pli absolut da 122 (Blocher ha survegnì 115 vuschs). Las medias rapportan d'in eveniment istoric.

Gia avant las elecziuns aveva la PPS communitgà che mintga commember da la partida, che acceptia in'elecziun senza esser stà nominà da la fracziun, na vegnia betg purtà da la PPS.

Popularitad e solidaritad

Ils 13-12-2007 ha quasi l'entira Svizra spetgà cun grond interess la decisiun. Widmer-Schlumpf ha declerà ch'ella acceptia l'elecziun, quai cunter il giavisch ed il squitsch da l'atgna partida. La partida populara svizra ha renfatschà a Widmer-Schlumpf ch'ella haja tradì l'atgna partida e na vegn betg stancla da disfamar la dunna grischuna.

Eveline Widmer-Schlumpf fa in pled avant ina gronda raspada
Legenda: Alliance F: in'allianza da solidaritad ha demonstrà cunter l'agir da la PPS cunter sia cussegliera federala. Keystone

La PPS ha reagì. Ella ha pretendì che la PPS Grischuna exclaudia Eveline Widmer-Schlumpf sco commembra da partida. La secziun grischuna ha refusà quai ed uschia ha il comité central da la PPS Svizra decidì ils 1-6-2008 d'exclauder l'entira secziun grischuna da la PPS.

La gronda part da la secziun grischuna ensemen cun auters commembers da la PPS dad auters chantuns han lura fundà pli tard la PBD, la partida burgais democratica. En la populaziun svizra è creschida la simpatia per la nova cussegliera federala betg il davos era pervi da l'agir da la PPS cunter ella. Il 2008 è ella vegnida onurada sco «Svizra da l'onn».

Il 2011 è Widmer-Schlumpf vegnida reelegida en l'emprim scrutini cun 131 vuschs. La PPS ha attatgà ses sez senza success.

Lavur en Chasa federala

Ils emprims 3 onns ha Eveline Widmer-Schlumpf manà il Departement federal da giustia. Letras grassas ha ella fatg en spezial cun restructuraziun e roschadas da persunal disfortunadas. Il 2010 ha ella surlaschà il departement a Simonetta Sommaruga. Ella sezza ha surpiglià l'uffizi da ministra da finanzas. Gia en il Grischun era ella directura da finanzas ed er commembra dal cussegl da la Banca naziunala Svizra. Ses agir en il Departement federal da finanzas è stà davent l'entschatta sut il squitsch da l'ester sin la plazza da finanzas svizra. Eveline Widmer-Schlumpf ha agì a moda decisa cunter las praticas. Ella vala sco promotura da la midada dal lieu da finanzas svizzer. Ella vala per ils ins era sco chavafossas dal secret da bancas.