Ju-52: Nova teoria per crudada - Center da gravitad memia davos en l’aviun - Novitads

Ju-52: Nova teoria per crudada Center da gravitad memia davos en l’aviun

Tenor l’expert d’aviatica Peter Frei saja il center da gravitad stà memia davos en l’aviun. Tar la Fora da Son Martin sajan ils passagiers stads si ed ids enavos per far fotografias.

Autur: SDA / Dominik Hardegger

Pervi dad in ferm suffel na saja la maschina silsuenter betg pli stada da controllar per ils dus pilots – suppona l’expert. Per el saja il rapport dal SUST tendenzius, scriva la «SonntagsZeitung». Tenor quest rapport – che n’è anc betg vegnì publitgà – è la raschun per la crudada da l’aviun stada in sbagl dals pilots. Els sajan sgulads bler memia bass ed hajan fatg manevers ristgants. Sch'il rapport dal SUST vegn publitgà anc quest onn n'è betg cler.

Tar crudada èn 20 persunas mortas

L'aviun veteran dal tip Junkers Ju-52 era crudà giu ils 4 d'avust 2018. A bord eran 17 passagiers e 3 persunas d'equipa. Vid il vrac han ins chattà sfessas e ruina, che eran dentant betg il motiv da la crudada.