Siglir tar il cuntegn

Header

Jürg Grossen
Legenda: Jürg Grossen a chaschun da la radunanza da delegads virtuala. Keystone
cuntegn

Jürg Grossen «La finamira da la PVL sto esser in sez en il Cussegl federal»

Il president dals verd-liberals svizzers Jürg Grossen vesa sia partia sin in'unda da success entamez la legislatura. In sez en il Cussegl federal stoppia esser lur finamira en in temp previsibel, ha Grossen ditg a la radunanza da delegads online.

ll presidi e la suprastanza dals verd-liberals sajan vidlonder da preparar las elecziuns naziunalas dal 2023. La partida veglia gudagnar marcantamain electurs ed er far il pass en il Cussegl dals chantuns.

Er in sez en il Cussegl federal sto esser nossa finamira
Autur: Jürg Grossen President PVL

En 25 dals 26 chantuns han ils verd-liberals entant ina secziun chantunala. La sonda ha la radunanza da delegads acceptà la secziun appenzellaisa, per omadus Appenzells, en la partida naziunala. Sulettamain en il chantun Uri na datti nagina secziun chantunala.

Tar las elecziuns dal 2019 veva la partida pudì augmentar sia cumpart d'electurs da 4,6 sin 7,8%. Tar la fracziun tutgan 16 cusseglieras e cussegliers naziunals.

Nov barometer dat raschun a la PVL

Avessan gì lieu elecziuns parlamentaras l'entschatta october 2021 fissan ils verd-liberals stads quels cun il pli grond gudogn d'electurs. Quai mussa il pli nov barometer d'elecziun da la SRG ch'è vegnì publitgà il venderdi. En cumparegliaziun cun las elecziuns dal 2019 avessan els fatg in gudogn da 2 puncts procentuals sin 9,8%.

Entant ch'ils verd-liberals gudognan perdan las ulteriuras partidas, cun excepziun da la PPS ed ils Verds, tranter 0,5 ed 1,5 puncts procentuals. En consequenza èn trais partidas uss bunamain tuttina fermas – numnadamain la PS, la PLD ed il Center.

Dus Gea's ed in Na il november

Ils verd-liberals han era decis lur parolas per las votaziuns federalas da la fin november. Els sustegnan cun gronda maioritad la lescha da Covid-19 - quai cun 131 cunter 8 vuschs. Tar l'iniziativa da giustia datti però in cler Na da las delegadas e dals delegads.

Pli dispitaivel è stà la decisiun areguard l'iniziativa da tgira. L'iniziativa vul evitar ina mancanza da persunal en la tgira. Uschia duai vegnir fixà en la Constituziun che chantuns e Confederaziun promovian la tgira sco element impurtant dal provediment da sanadad. Suenter lunga discussiun èn 96 delegadas e delegads s'exprimids per e 34 cunter l'iniziativa da tgira, tar 12 abstenziuns.

audio
Per tadlar curt e cumpact
aus RTR Audio vom 16.10.2021.
abspielen. Laufzeit 58 Sekunden.

RTR novitads 11:00

Artitgels legids il pli savens

Scrollar a sanestra Scrollar a dretga