L'aura fin il 1. d'avust
Tenor Jürg Zogg da SRF Meteo resti en l’entir Grischun vinavant chaud. La gievgia vegnia a Cuira fin 31 grads ed il venderdi fin 34 grads. Er a San Murezzan creschan las temperaturas fin a 25 grads. Cun las temperaturas autas èsi era pussaivel ch’i dat urizis locals. Il decurs da la gievgia datti en la Bregaglia ed il Mesauc plirs nivels da cumulus ed urizis locals.
Per il prim d’avust èsi previs ch’i resta sitg. Dentant saja l’aria lura fitg umida uschia ch’i possia era durant il di da la festa naziunala dar in u l’auter urizi local.
La Confederaziun admonescha dad in’unda da chalira en Svizra cun temperaturas fin 38 grads. Quai rapporta l’agentura da novitads SDA. Pertutgads da la gronda chalira èn fin la sonda saira il sid da las Alps, il Vallais e la regiun enturn Genevra. Per intginas persunas pudess la chalira esser in ristg per lur sanadad.
Urizis ferms il mardi
En pliras part da la Svizra hai dà ferms urizis. Sco SRF Meteo scriva, hajan ils urizis purtà en divers lieus granella da fin a quatter centimeters, ferma plievgia e vents furius.
Suffels da stemprà d'enturn 100 kilometers per ura hai tranter auter dà a Visp en il Vallais ed ad Oberriet en il Son Gagl. In suffel da 123 kilometers per ura han ins mesirà sin l'Eggishorn en il Vallais.
Parts da la Surselva senza electricitad
En connex cun in urizi èn en parts da la Surselva l'electricitad crudada ora mardi suentermezdi. Bunamain in'ura e mesa sajan 1'200 clients en ils vitgs Affeier, Surcuolm e Flond stads senza current, communitgescha la Repower.
E tranter Pitasch e Duin è ina planta cupitgada sin ina lingia. Uschia hajan 650 chasadas da Duvin, Camuns e Pitasch stuì star durant trais quarts d'ura senza electricitad, tenor la Repower.
