L’Andermatt Swiss Alps ha fatg ina svieuta da bunamain 181 milliuns francs. Sut il stritg haja la gruppa fatg in gudogn da passa 34 milliuns francs. Quai ha communitgà l’Andermatt Swiss Alps. Pervi da la gronda dumonda da la Svizra e da divers martgads internaziunals vul l’Andermatt Swiss Alps investir radund ina mesa milliarda francs ad Andermatt ed a Sedrun ils proxims onns.
Gudagnà passa 151 milliuns cun vender immobiglias
La dumonda suenter immobiglias saja creschida fetg. Uschia ha l'interpresa cun entradas da 151 milliuns francs gudagnà 24% dapli che l'onn avant. Quai malgrà che l'interpresa ha vendì cun 70 pli paucas abitaziuns cumpareglià cun l'onn avant cun 92 abitaziuns. Il pretsch per meter quadrat saja creschì per 17% sin passa 17'500 francs. Ils davos diesch onns è il presch per meter quadrat s'augmentà per passa 50%.
Er Orascom, la societad purtadra da l’Andermatt Swiss Alps, possia guardar enavos sin in onn da fatschenta zunt positiv: La svieuta saja s’augmentada per 28% sin 590 milliuns francs ed il gudogn per 440% sin 51 milliuns, hai num en ina communicaziun dal concern da l’investider egipzian Sami Sawiris.
