Il temp dals pollens è puspè qua. Las plantas ed ils prads flureschan ed uschia sa derasan era ils pollens puspè. Ils sintoms tipics d'ina allergia da pollen èn:
- egls cotschens che piztgan
- il nas che curra ed
- ins sto starnidar pli savens.
Il temp da pollen cumenza, cura che l'alet sategl e l'ogn flureschan. Quai è per il pli different. Ma quest onn ha la stagiun cumenzà la segunda emna da schaner. La stagiun auta cumenza dentant pir in pèr mais pli tard, cura ch'igl è pli chaud ed ils pastgs flureschan.
L'avrigl ed il matg vegnan ils pollens dals pastgs. Els èn la raschun principala d'ina allergia da pollen.
Igl è dentant pussaivel da tractar e mitigiar ils sintoms dad ina strucca da fain. En emprima lingia èsi fitg impurtant da guntgir il contact direct cun pollens. Quai pon ins far per exempel cun lavar la saira ils chavels per betg prender en letg ils pollens, u cun dar aria a la chombra mo curt. Quai che po era gidar èn egliers da sulegl - e betg laschar setgentar la laschiva frestga ordavert.
Sche questas mesiras na gidan betg, datti dus differents tractaments. L'emprim pon ins prender medicaments, per exempel en furma da daguts per ils egls. Quests medicaments pon ins cumprar en l'apoteca. Il segund è ina terapia da desensibilisaziun.
Desensibilisaziun - u vaccinaziun da pollen
Ina desensibilisaziun è ina vaccinaziun, cun la quala ins po cumbatter in'allergia da pollen a l'origin. Quest process va sur plirs onns – ed uschia pon ins curar l'allergia pass per pass. Ina desensibilisaziun è pussaivla en furma da squittas u da tablettas.
Igl è impurtant ch'ins tractia in'allergia da pollen ed ils sintoms. Sch'ins ignorescha els, po quai avair consequenzas: Dal nas e dal culiez po l'allergia sa derasar en il lom. Lura discurr'ins d'ina midada d'etascha. Questa midada d'etascha provotgescha in asma allergic.
La stagiun da pollens è per il pli passada, cura che las plantas perdan lur feglia ed ils prads èn segads. Er sch'ina allergia da pollens po esser fitg malempernaivla, pon ins tractar ils sintoms e per part schizunt guarir l'allergia dal tuttafatg.