- A Zermatt è ida a val glindesdi da Pasca ina lavina ch'ha tschiffà pliras persunas.
- Trais persunas èn mortas sut las massas da la naiv. Ina persuna han ins chattà blessada.
- Las forzas da salvament han per il mument terminà la tschertga.
- La lavina è ida a val al Riffelberg tar Zermatt en ina zona da variantas.
- Truppas da salvament tschertgan in'ulteriura unfrenda
Suenter la disgrazia da lavina a Zermatt tschertgan truppas da salvament in'ulteriura unfrenda. Tenor la polizia chantunala dal Vallais è in um da 30 onns vegnì annunzià sco sparì. I saja da supponer che l'um saja era vegnì en la lavina. En ina gronda lavina èn almain trais persunas mortas glindesdi da Pasca datiers da Zermatt. Ina quarta persuna saja vegnida chattada viva, ha rapportà la polizia en il chantun Vallais.
La polizia aveva tschertgà pliras uras las persunas sparidas. La lavina è ida a val il suentermezdi las 14:00 en il territori da skis da Riffelberg – tenor la polizia en in territori da variantas. Quai è terren cun naiv entira sper las pistas marcadas nua che skiunzs cun experientscha van normalmain.
Il privel da lavinas en las Alps
L’institut per la perscrutaziun da naiv e lavinas (SLF) sbassà il privel da lavinas sin considerabel. Il SLF aveva avertì il glindesdi en damaun d’in grond privel da lavinas – quai en il Vallais ed en il Grischun. «Igl è da quintar cun lavinas spontanas fitg grondas e singulas fitg grondas», èsi vegnì communitgà. Er en il Tirol en Austria ed en il Tirol dal sid è stà grond privel da lavinas. Ils motivs eran la blera naiv nova ed ils vents per part d'orcan ch'han procurà per grondas accumulaziuns da naiv.
Tar pistas da skis marcadas procuran experts dal territori da skis ch’els vegnian serrads en cas da privel da lavinas. Ordaifer las pistas marcadas ston ils sportists valitar sez il privel. En Svizra èn 17 persunas mortas l’enviern 2023/24 enfin la fin da mars, quai tar 13 accidents da lavinas.
