La sonda èn duas persunas vegnidas en ina lavina a Tavau Monstein. In'ulteriura è vegnida il venderdi en ina lavina a Saas Grund, ed in skiunz han ins chattà mort sur Parpan.
Il pli actual accident è stà quel a Tavau Monstein. Durant che las forzas da salvament han chavà or in um sur Tavau Monstein, hai dà in ulteriur clom d'agid. Entant che las forzas han pudì salvar l'um en l'emprim cas, n'hai betg pli tanschì en il segund cas. La Polizia chantunala ha scrit, che quel saja vegnì chattà gia mort sut la lavina.
-
Bild 1 von 2. Lavina sut il Leidbachhorn. La lavina ha sutterà in um ch'è stà sin ina tura da skis. Bildquelle: Keystone.
-
Bild 2 von 2. L'um en la lavina sut l'Erezberg han las forzas d'agid pudì salvar, el è dentant grev-blessà. Bildquelle: Polizia chantunala.
In ulteriur sportist d'enviern è vegnì chattà mort la sonda sur Parpan. Gia dapi il mardi l'emna passada è el stà sparì. En ina acziun gronda da tschertgar è el vegnì chattà en in cugn da lavinas, tenor indicaziuns da la Polizia chantunala.
En l'acziun da tschertga sajan 17 commembers e commembras dal salvament alpin, quatter chauns e trais helicopters stads en acziun. Il lieu da l'accident è stà ordaifer da las pistas segiradas.
L'um da 54 onns è probablamain ì il mardi cun las pendicularas sin l'Urdenfürggli. Confamigliaras e confamigliars han annunzià ch'el saja sparì il mardi. Chattà l'um ha il salvament alpin grischun cun l'agid d'in chaun da lavinas.
Ulteriur mort en il Vallais
A Saas-Grund en il Vallais è in skiunz vegnì venderdi en ina lavina. Tenor l'institut federal per la perscrutaziun da naiv e lavinas è quai stada ina da set victimas da lavinas da quest onn.
Il skiunz saja vegnì tschiffà da la lavina sin ina pista da traversa en il territori da skis Kreuzboden-Hohsaas. En la regiun è er in'autra persuna vegnida en ina lavina, ella è dentant vegnida spendrada da l'Air Zermatt. Er questa persunas era da viadi ordaifer las pistas.
L'institut da perscrutaziun da naiv e lavinas avertescha d'in grond privel da lavinas en il Goms ed en il territori dal Simplon. Er en il Grischun vala il stgalim 4 en tschertas regiuns. I dat la pussaivladad da lavinas spontanas ed er fitg grondas.