En Svizra han las dunnas prestà l’onn passà var 50% dapli lavur en chasa e per la famiglia ch’ils umens. Tenor l’Uffizi federal da statistica han ellas investì var 29 uras mintg’emna, ils umens 19,1 uras.
Lavur pajada
Auter vesa quai ora tar la lavur pajada. En ina chasa cun uffants prestan um e dunna 70 uras da lavur l'emna. Tar las dunnas èn quai passa 50 uras betg pajadas, tar ils umens èn quai dentant be var la mesadad dal temp.
Il studi mussa er che tar las dunnas è creschida la lavur en chasa per passa in'ura l'emna, tar las lavurs pajadas èn quai 3 uras. Tar ils umens è sa reducì il temp da lavur pajà per passa 4 uras l'emna, tar la lavur en chasa dentant s'augmentà per 5 uras.
Mintg'onn 20 minutas dapli
La buna nova, l'agid da l'um s'augmenta mintga onn per 20 minutas. Il pli gugent cuschinan ils umens, numnadamain 4,3 uras per emna, tar las dunnas èn quai 7,8 uras. Tar il schubregiar investeschan ils umens 2,1 uras, las dunnas dapli ch'il dubel. Il pli pauc engaschi mussan ils umens en la lavanderia. Els gidan 0,6 uras , las dunnas investeschan 2 uras per lavur e far ora cun il fier per emna.
