Siglir tar il cuntegn

Header

cuntegn

Leopard 2 Parlament ha decidì da prender ord la flotta 25 panzers

L'armada svizra po zavrar ord la flotta 25 dals panzers da Leopard 2 ch'èn ord funcziun. Quai sut la premissa ch'ils panzers vegnan vendids enavos al producider tudestg Rheinmetall. Suenter il Cussegl naziunal ha er il Cussegl dals Chantuns approvà quest pass. La Germania aveva dumandà la Svizra da cumprar enavos ina cumpart dals panzers ch'èn ord funcziun. Ella ha empermess al Cussegl federal da na betg dar vinavant els a l'Ucraina.

Panzer Leopard 2
Legenda: In mecanist fa lavurs da mantegniment vi d'in panzer dal tip Leopard 2. Keystone

Proposta da minoritad è vegnida refusada

La Svizra posseda totalmain 96 panzers Leopard 2 ch'èn mess ord funcziun. Il Cussegl dals chantuns ha era gì da decider davart ina proposta da reactivar ils ulteriurs 71 panzers fin l'onn 2035 ubain els remplazzar tras in sistem pli modern. El ha refusà il project cun 23 cunter 18 vuschs e duas abstenziuns. La proposta da minoritad haja sulettamain caracter declarativ, ha crititgà Gmür-Schönenberger. L'armada haja en mintga cas l'intenziun da puspè metter en acziun ils chars armads.

En connex cun il messadi davart l'armada 2023 ha il cussegl dals chantuns gì da decider davart quatter conclus federals. Sco il cussegl naziunal vul el metter a disposiziun a l'armada 1,9 milliardas francs per cumprar material d'armament e material e per pudair investir en lur immobiglias.

Ina part da la missiva è in program d'armament da 275 milliuns francs. En quel program èn cuntegnids la cumpra da 24 chars armads per tiradurs da rodas dal tip Piranha IV sco er l'acquisiziun da bittamissils per il sistem da defensiun da l'aria. Il parlament è er d'accord cun il rom da pajament per l'armada ch'è vegnì augmentà per 600 milliuns francs sin 21,7 milliardas francs per ils onns 2021 fin 2024.

audio
Per tadlar: las novitads da las 12:00
ord RTR Audio dals 26.09.2023.
laschar ir. Durada: 4 minutas 17 Secundas.

RTR novitads 12:00

Artitgels legids il pli savens