Festivals e persunas independentas duain survegnir dapli daners d'agid da la Confederaziun. Concret ha il cussegl naziunal decidì en il rom da la debatta da la Lescha da Covid-19 da sustegnair la branscha dad events quest onn cun 350milliuns francs supplementars.
Sulettamain la fracziun da la PPS è stada encunter. Il sustegn duai valair per manifestaziuns ch'èn prevesidas da l'entschatta zercladur da quest onn fin l'avrigl da l'auter onn.
Tenor il minister da finanzas Ueli Maurer saja quest'idea gnanc uschè antipatica. L'artitgel da lescha stoppia dentant anc vegnir precisà en il Cussegl dals chantuns.
Ulteriuras 9 milliardas francs per cas da direzza
La segunda revisiun da la Lescha da Covid-19 è vegnida stumplada cun l'augment dals daners da direzza per las interpresas. Il Cussegl federal vuleva dar ora maximalmain 10milliardas francs. Uss ha il Cussegl naziunal proponì midadas che custassan quasi anc ina giada tant. In terz surpigliassan ils chantuns.
