- Cussegl naziunal vul anc adina avrir pli ferm la cassa federala per l'agid.
- Decidì ha la Chombra gronda er da betg perscriver al Cussegl federal che ustarias ed autras branschas ston avrir ils 22 da mars.
- Er il paragraf che vuleva ch'il Cussegl federal sto dumandar per lubientscha tar mesiras severas ha fatg naufragi.
Il Cussegl naziunal vul vinavant avrir pli fitg la cassa federala per gidar durant la crisa da corona. Quai è sa mussà la gievgia, cura che la chombra gronda ha gì discutà a fin la lescha da Covid-19.
Uschia vul il Cussegl naziunal vinavant sustegnair persunas cun gudogn independent, gia sch'ellas han la svieuta ch'è sa reducida per 20%. Il Cussegl dals chantuns vul far quai pir tar ina reducziun da 40%, envers la media da plirs onns.
Ed il Cussegl naziunal vuless era levgiaments supplementars per locatarias e locataris, che han retard cun pajar tschains. La lescha da Covid-19 va uss enavos al Cussegl dals chantuns, il glindesdi discuta el quella per la terza giada.
Nagin dictat per il Cussegl federal
Il glindesdi era sa mussa ch'il Cussegl naziunal na vul betg scriver en la lescha da Covid-19 che ustarias e locals da divertiment ston avrir ils 22 da mars. Percunter ha ella decidì d'augmentar la summa da daners per cas da direzza e dapli daners duai era dar per la branscha d'eveniments e persunas che lavuran sur sasez.
La polemica è stada gronda, las smanatschas maiudidas. Il Cussegl federal haja fatg da la Svizra ina dictatura ed i saja ussa l'obligaziun dal parlament da restrenscher la pussanza da la regenza.
Bain n’èsi era durant la debatta davart la lescha da Covid il glindesdi betg vegnì spargnà cun critica envers il Cussegl federal, mo cura ch'i ha gì num da mussar colur e da votar, ha ina clera maioritad da la Chombra gronda puspè laschà sentir il saun giudizi. Ed uschia ha era la proposta da scriver en la lescha ina data d'avertura per ustarias, locals da divertiment e da sport, gea perfin per ils stans da tir, cleramain fatg naufragi.
Il medem è schabegià cul paragraf che leva ch'il Cussegl federal stoppia dumandar per lubientscha il parlament avant che decider mesiras severas.
