Il Cussegl federal duai agir cun mesira per cumbatter la derasaziun dal coronavirus. Quai manegia il Cussegl dals chantuns. Quel ha agiuntà a la lescha da Covid-19, ch'il Cussegl federal duai drizzar sia strategia uschia, ch'i dettia uschè miaivlas e curtas restricziuns sco pussaivel. Ultra da quai vul la Chombra pitschna metter a disposiziun stgars 15 milliardas francs dapli per surmuntar la crisa.
Onurar chantuns exemplarics
Vitiers ha il Cussegl dals chantuns approvà ina proposta dal cusseglier grischun Martin Schmid, ch'il Cussegl federal duai onurar chantuns, che lavuran exemplaricamain quai che pertutga corona. Ina ulteriura midada en la lescha da Covid-19 che la Chombra pitschna ha decis è, che persunas vaccinadas na duai betg pli stuair ir en quarantina. Nagina schanza ha percunter gì la proposta da dar in dretg da veto en chaussa al parlament.
Durant la debatta en il Cussegl dals chantuns han plirs cussegliers intimà il Cussegl federal da procurar che la populaziun e l'economia hajan dapli perspectivas. Malgrà critica envers il Cussegl federal n'ha la Chombra pitschna dentant betg vulì scriver in data d'avertura en la lescha. La politica da corona da la regenza è stada il grond tema tar la debatta d'entrada per la lescha da Covid-19 surlavurada.