Locataris pon esser levgiads: Suenter dus augments en successiun resta il tschains da referenza per locaziun en Svizra tar 1,75%. Quai ha communitgà l’Uffizi federal d’abitaziuns. Uschia na dastgian ils proprietaris da chasas betg augmentar il tschains da locaziun.
L’onn passà è il tschains da referenza vegnì augmentà en dus pass da 1,25 sin 1,75%. Quai suenter che la Banca naziunala svizra ha midà sia politica monetara. En consequenza han intgins locaturs augmentà ils tschains per passa 10%. Il tschains da referenza è vegnì introducì il 2008. Lura muntava el anc a 3,5%.
Las ratas d'inflaziun sbassadas gidan
Economs ch'èn vegnids dumandads da l'agentura da novitads AWP n'avevan betg spetgà in augment unanim. Pertge tar ils tschains ipotecars, nua ch'il tschains da referenza s'orientescha, haja quai dà il davos ina schluccada. Motiv è stà che las ratas d’inflaziun en sa sbassadas ed la speranza sin in sbassament dal tschains da la Banca naziunala.
Bain vegn mintga ipoteca che vegn serrada giu da nov da princip pli chara, quai che tira engiu la tariffa dal tschains media. La distanza da la proxima limita dad 1.875% è dentant anc adina fitg gronda. Pir cura che questa valur vegn surpassada, succeda il proxim augment, damai che la tariffa dal tschains da referenza vegn auzada u curregida tar la calculaziun sin la proxima valur dal quartal.