Siglir tar il cuntegn

Header

audio
Lockdown sco en l'Austria n'è betg il dretg instrument per la Svizra dian Markus Hasler e Thomas Hofer
Or da Actualitad dals 19.11.2020.
laschar ir. Durada: 03:57 minutas.
cuntegn

Lockdown u betg Austria nagin exempel per la Svizra

Ils turistichers Thomas Hofer d’Adelboden e Markus Hasler da Zermatt na vulan nagin lockdown en Svizra.

Els hajan bler da far quels dis, di Thomas Hofer, il president da l'Uniun dals hoteliers d’Adelboden, Lenk e Kandersteg en il chantun Berna. La bell'aura carmalia siadora blers giasts da la Bassa che veglian scappar da la tschajera.

Ussa il november essan nus sin in nivel sco il favrer, quai n’è betg da crair quai che marscha tar nus. Per nus èsi bunamain grev da pudair lavurar uschia e da servir ils giasts. Gist da bell’aura èn quai dis grondius.
Autur: Thomas Hoferpresident da l'Uniun dals hoteliers d'Adelboden

Giasts svizzers procuran per buna fatschenta

Cudeschà vegni bain a curta vista, dentant sch'ils giasts sajan lura ina giada en il lieu consumeschian els er bain, di Hofer che maina l'Hotel Des Alpes ad Adelboden, ch'è era enconuschent per sia cuschina.

I na fa perquai betg surstar ch'el na vesa il lockdown en l'Austria betg sco in mussavia per la Svizra. Nagin che possia garantir ch'in tal lockdown portia lura er quai ch'ins speria.

Uss avain nus almain anc la speranza. La glieud cumpra abunaments da stagiun per il territori da skis, els cudescheschan era. Mo sche nus serrain per trais emnas ni in mais, cudescheschan els lura per l’enviern? E tge fatsch jau cun ils collavuraturs? Jau na sun betg segirs che quai è propi la buna via.
Autur: Thomas Hoferpresident da l'Uniun dals hoteliers d'Adelboden

«Vallais ha decidì endretg»

En in'autra situaziun è Markus Hasler, il schef da las pendicularas da Zermatt. Il Vallais ha gia decidì mez october mesiras severas per cumbatter il coronavirus. E dapi l'entschatta dal mais èn ussa er anc las ustarias serradas. E quai tutga er ses manaschi. Bain è il territori da skis puspè avert ed ils skiunz vegnan er en fullas per giudair la bell’aura en las muntognas vallesanas. Las numerusas ustarias da las pendicularas èn dentant serradas. Malgrà quai è el da l'avis ch'il Vallais fetschia quai endretg.

Las mesiras ch’ins ha decidì han ina influenza positiva ed èn segir il fundament per pudair giuditgar sch’ins haja Nadal e Bumaun in manaschi pli u main cumplain cun restricziuns.
Autur: Markus Haslerschef da las pendicularas Zermatt

Anc pli sever, perfin in lockdown sco en l’Austria, n’è per el dentant betg necessaris. Las cifras d'infecziuns en il Vallais giajan puspè enavos. Quai mussia che las mesiras hajan l'effect giavischà. Da serrar tut sco en l’Austria pudessia er avair in effect cuntrari a lunga vista, tema el.

Lura vegnin nus ord il lockdown suenter quatter emnas e tuts han lura il sentiment che tut è puspè bun. Lura èsi prest meglier sch’ins ha prendì las mesiras e sch’ins ha disà la glieud vid las mesiras da tegnair atras quellas uschè bain sco pussaivel.
Autur: Markus Haslerschef da las pendicularas Zermatt

Era sche quellas hajan consequenzas finanzialas per la fatschenta. Els na possian numnadamain betg serrar tut e betg cuntinuar cun las preparativas per la stagiun d’enviern. In tal pass dess in fauss signal e faschess er donn a tut quels che sajan dependents dal turissem a Zermatt.

Mitschar cun in egl blau

Tant Markus Hasler da las pendicularas Zermatt sco era l'hotelier Thomas Hofer d’Adelboden èn da bun curaschi. Sche la situaziun cun il coronavirus na vegn betg tuttenina mendra vegnian els da mitschar cun in egl blau, forsa stgir blau.

RTR actualitad 08:00

Artitgels legids il pli savens

Scrollar a sanestra Scrollar a dretga