En il chantun da Lucerna è l’emprima persuna vegnida vaccinada oz avantmezdi cunter il coronavirus. Quai ha confermà il directur da sanadad Guido Graf. Vaccinada saja vegnida ina dunna da 90 onns.
Dasper Lucerna vulan er auters chantuns sco l’Appenzell Dadens cumenzar oz cun vaccinar. Auters chantuns vulan lura cumenzar l'entschatta da schaner. Era il Grischun entscheiva ils 4 da schaner u il pli tard lura mez schaner cun las vaccinaziuns.
Actualmain datti en Svizra mo la lubientscha per il vaccin da Biontech/Pfizer. Pro persuna èn duas dosas da quest vaccin necessarias. La Svizra ha empustà en tut trais milliuns dosas da Biontech.