Las nursas sajan vegnidas stgarpadas ils 26 d'avrigl dad in mastgel (M149) ed ina femella (F93). Quests dus animals tutgan tar il triep da Onsernone. Da quel han ins fin uss pensà ch'el saja pli lunsch en il sid da la Valle Rovana. Il triep è adina puspè passà sur il cunfin da la Svizra cun l'Italia.
Pervi da quai saja la lubientscha vegnida dada sut faussas premissas e stoppia perquai vegnir revocada, hai gì num en ina communicaziun. Las autoritads chantunalas sajan en contact cun l'Uffizi federal d'ambient, per discutar co cuntinuar.
Tschertga stada senza success
Ils selviculturs n'avevan fin uss anc betg chattà l'animal ch'era stà lubì da sajettar. La tschertga vegn uss sistida enfin ch'il BAFU prenda ina decisiun. Il medem mument vegnia la situaziun observada vinavant da las autoritads tessinaisas. I giaja sur tut per constatar sch'il triep ha survegnì pitschens quest onn.
Las 19 nursas stgarpadas sajan stadas l'avrigl en in territori cun ina greva topografia. Perquai n'èsi betg stà pussibel da proteger ellas. Perquai vegnan ellas quintadas per la quota da stgarps. Quai è relevant per pudair decider la finala sch'er in animal d'in triep po vegnir sajettà u betg.
Deponì nursas stgarpadas davant edifizi da regenza
La fin avrigl avevan purs da la Val Maggia deponì pliras nursas crappadas davant l'edifizi da la regenza a Bellinzona. Uschia han els reagì sin in stgarp da nursas a Cerentino ed han pretendì da la regenza dapli mesiras en il cumbat encunter il luf.
Gia la fin mars ha in luf stgarpà pliras nursas en la Valle Rovana. Mez avrigl ha in luf stgarpà en il sid dal Tessin, tar Novazzano 13 animals.