En ina brev averta sa drizza l'uniun che vul proteger il territori d'animals da rapina gronds a la cussegliera federala Simonetta Sommaruga. L'uniun pretenda ch'i dettia lubientschas spertas e nunbirocraticas per sajettar lufs che fan donns. Autramain vesa l'uniun il privel ch'ils possessurs da muntaneras prendian sezs enta pugn il scepter. Quels sajan frustrads, perquai ch'i haja dà dapi l'entschatta da la stagiun gia passa 50 stgarps d'animals da niz en il Tessin e passa 30 en il Vallais.
Nursas crappadas avant l'edifizi da la regenza a Bellinzona
Suenter in stgarp da nursas en il district Vallemaggia en il Tessin, avevan purs deponì la fin avrigl pliras nursas crappadas avant l'edifizi da la regenza chantunala a Bellinzona. Quest'acziun saja stada in protest cunter la «politica dal luf» en Svizra. Quai han rapportà la Televisiun ed il Radio per la Svizra taliana RSI.
Il purs ch'èn stads da la partida han tenor atgnas indicaziuns reagì sin plirs stgarps da nursas durant las emnas passadas – stgarps ch'èn probablamain d'attribuir ad in luf. Quai saja stà in'acziun da demonstraziun per intimar il chantun da far dapli cunter il luf. Manà quest protest ha Armando Donati, il president da l'uniun per in territori senza gronds animals da rapina.
