En il Nordost da la Svizra hai puspè dà ferma plievgia. Tenor SRF Meteo hai dà ad Eschenz en il chantun Turgovia entaifer da be 10 minutas passa 27 millimeters plievgia. Quai saja fitg bler, dentant betg in record absolut. Ferms urizis cun granella hai cunzunt dà en la regiun da Kreuzlingen.
Tenor SRF Meteo saja la situaziun sa calmada per il mument. Dentant saja il decurs dal suentermezdi puspè da quintar cun ferms urizis en la regiun.
Segunda notg cun malauras
Gia la notg sin ier èn vias e tschalers vegnids inundads en il nordost da la Svizra.En il chantun da Turitg saja la polizia stada passa 160 giadas en acziun. Bovas hajan bloccà vias, sco per exempel tranter Kempthal ed Illnau-Effretikon. Er en il chantun da Turgovia saja la polizia stada bleras giadas en acziun pervi da tschalers inundads. Durant la notg haja dà radund 50 annunzias pervia da innundaziuns. Las autoritads dal chantun avevan gia il glindesdi a bun'ura annunzià in privel d'aua gronda.
Er la Svizra franzosa saja stada pertutgada da ferma plieviga. La via dal pass al Col del a Croix en il chantun Vad resta serrada pervi dal privel da bovas. Tenor SRF Meteo resta la situaziun per part tendida enfin damaun.
Blera plievgia la dumengia e glindesdi
Tenor SRF Meteo hai dà en Svizra tudestga fin a 100 millimeters plievgia durant 48 uras. Cunzunt en la Svizra orientala èsi vegnì ensemen blera plievgia. Il pli bia ad Urnäsch en il chantun Appenzell Dadora – Quai cun 103 millimeters entaifer 24 uras. Quai correspunda a la mesadad da la plievgia totala durant il zercladur.