A Dombresson èn las vias stadas passa in meter sut l'aua, ha declerà il pledader da la polizia Pierre-Louis Rochaix sin dumonda da l'Agentura da novitads svizra. La persuna grev blessada è vegnida transportada en l'ospital a Berna. Ils auters trais blessads èn mitschads cun blessuras levas.
Pigliads en lur autos
Pliras persunas èn stadas pigliadas en lur autos ed han stuì vegnir salvadas or dals vehichels. Auters autos èn vegnids vulvids sin tetg ed er or da quels han las forzas da salvament stuì spendrar persunas. Anc al lieu ha la sanitad tractà set persunas.
Tranter las 22:00 uras il venderdi saira e las 03:45 uras hai dà passa 540 cloms d'agid tar la Polizia chantunala, quai sulet or da la Val-de-Ruz. Plinavant è il current electric stà interrut. La bun'ura eran anc 150 chasadas senza electricitad. La situaziun sa calma dentant plaunet.
Donns considerabels
Ils donns vid edifizis èn considerabels. Tschalers e garaschas sutterranas èn vegnidas inundadas, rievens èn glischnads giu e la via tranter Dombresson e Le Pâquier è vegnida donnegiada. La via ch'è cuvrida cun restanzas ed autos stgarpads cun da l'aua è serrada e quai vegnia er a restar uschia per las proximas uras.
Novas malauras da viadi
Tar ils auals Ruz Chasseran e Seyon vegn il mument lavurà cun tutta forza. Ils servetschs meteorologics han numnadamain annunzià anc dapli plievgia. Perquai ston ils dus auals puspè esser uschè libers sco pussaivel per che l'aua che vegn po cular davent. Anne-Christine Pellissier dal stab da crisa da la vischnanca ha declerà che las lavurs giajan il mument svelt. Ils pumpiers quintian dentant che las lavurs da rumida cuzzian anc fin dumengia.
Las autoritads han avertì la populaziun dad ir en garaschas sutterranas e sumegliantas stanzas. Plinavant na duess ins er betg charrar u ir sin vias inundadas.
RR novitads 08:00
