En parts da la Svizra hai ier dà ferms urizis. Tranter auter er ad Appenzell. Là hai pluvì ier saira uschè bler entaifer 10 minutas sco da rar en Svizra, numnadamain passa 33 liters per meter quadrat. Quai ha communitgà SRF Meteo.
Fin mesanotg hai dà tenor indicaziuns dal servetsch da l'aura Meteonews bunamain 30'000 chametgs e sutner mesanotg anc ina giada 5'000. Ils pli blers en ils chantuns Son Gagl, Turgovia e Turitg. Ils urizis han era purtà granella e suffels d’orcan. En il chantun Berna hai per exempel dà granella cun in diameter da 2 enfin 4 centimeters.
La dumengia endamaun hai danovamain dà ferms urizis. Pertutgadas en spezial eran tenor SRF Meteo il Tessin, il Mesauc e la Svizra centrala. En questas regiuns hai la daratga per part chaschunà sbuvaditschs ed interrut lingias da viafier e vias. Uschia era per exempel il pass dal Lucmagn per bun duas uras serrà sin la vart tessinaisa. Vitiers ai dà malauras en la regiun da Chiavenna en l'Italia. Las vias vers la Svizra èn actualmain bloccadas.
Situaziun stabial da l'aua gronda
Cunquai ch'i n'ha tenor SRF Meteo betg dà lungas daratgas e plievgia n'è la situaziun d'aua gronda betg sa midada. Tenor il bulletin da privels da natira da l'Uffizi federal per ambient è il nivel dal Lai da Neuchâtel sa sbassà da stgalim 4 sin stgalim 3 (privel considerabel). Er al Lai da Bienna è la situaziun stabila. La notg sin sonda era il nivel da l'aua sa sbassà sut la limita d'auas grondas. Tar ils lais da Thun e Brienz vala actualmain stgalim da privel 1 (privel pitschen).
