Per impedir che l’energia vegnia stgarsa durant l’enviern, veglia il Cussegl federal proximamain decider davart diversas mesiras. Quai ha ditg la ministra d’energia Simonetta Sommaruga en in’intervista cun il «SonntagsBlick». I fetschia franc senn da spargnar 15% gas – analog a la finamira da l’Uniun europeica.
Dar in bun exempel e sensibilisar cun campagna
Per ella saja cler che l’administraziun publica stoppia dar in bun exempel. Ella vegnia a s’engaschar en il Cussegl federal ch’i vegnia stgaudà damain en edifizis publics, uschia Sommaruga vinavant. En pli duaja bainprest dar ina campagna da la Confederaziun. Il messadi principal da quella saja ch’ins stoppia chalar da sfarlattar energia. Mo stgaudar in grad pli pauc, spargnia gia 5% energia. Che questa campagna vegnia pir lantschada l’atun – e betg gia pli baud sco per exempel en la Germania – dependia da la producziun da la forza electrica indigena: La Svizra produceschia ina gronda part dal current ord forza idraulica, ha argumentà la ministra d’energia.
