Limitaziun da la temperatura interna sin 20 grads sch'i vegn stgaudà cun gas, naginas excepziuns supplementaras da la contingentaziun da retratga da gas – quai èn las mesiras ch'il Cussegl federal ha preschentà mesemna. En la proposta oriunda da l’ordinaziun era anc previsa ina limita da 19 grads. 20 grads sajan pli simpel da mesirar ed da reglar, ha il Cusseglier federal Guy Parmelin declerà. 20 grads correspundian al numer trais sin ils regulaturs dal stgaudament en las stanzas.
En cas da scortezza da gas prevesa il Cussegl federal da scumandar da stgaudar stanzas che na vegnan betg duvradas, bogns e saunas sco era indriz da radiaturs da stgaudar terrassas d’ustarias. Quai vala per interpraisas sco era per chasadas privatas.
Grils e bugliders da gas restan legals
Nagin scumond datti per indriz che vegnan alimentads cun buttiglias ni cartuschas da gas. Uschia èsi era en ina situaziun da scortezza da gas lubì da duvrar il gril da gas sin il balcun ni il buglider da gas.
Anc examinada vegn in'interrupziun a curta vista da consuments da gas gronds. Uschia duajan en 24 uras vegnir spargnadas grondas quantitads d’energia. Il Cussegl federal ha incumbensà il Departament d’economia d’examinar las pussaivladads per indemnisar e superar ils custs da las tariffas creschentas da gas.
I duai dar sbozs d’ordinaziuns per il cas dals cas. L’economia aveva pretendì in cler plan d’urgenza. Sch’i vegn a dar quest enviern ina mancanza da gas lascha il Cussegl federal avert. «Quai n’è betg pussaivel da prognosticar e dependa sper l’aura ed las temperaturas era da facturs geopolitics», ha ditg il minister d’economia Guy Parmelin avant las medias a Berna. Il mument saja la situaziun dentant buna. Sclauder na possian ins dentant nagut.
