I vegn stgars cun la verdura svizra. Tar las producentas ed ils producents da verdura en Svizra datti gronds donns e quai per part sin l’entira surfatscha, di il vicedirectur da l'uniun svizra da producents da verdura Markus Waber.
La granella haja oravant tut fatg donns tar ils zuchettis, tar il cardifiol e tar la salata. Ma era la verdura per magasinar sco las carottas u il sellerin pateschan. I na saja betg pussaivel da racoltar avunda verdura era per l’enviern. Uschia sajan las consequenzas da la plievgia che cuntinua, da badar enfin la proxima primavaira, di Waber. Uschia èsi d’importar dapli verdura.
Per pudair valitar ils donns dat era la segiranza ina survista. En las ultimas emnas èn vegnids annunziads 8'000 donns da granella ha ditg Pascal Forrer, il directur da la segiranza svizra da granella, envers Radio SRF. Igl èn vegnids annunziads donns da tut las culturas che pon vegnir segiradas.
Verdura Grischuna betg pertutgada
Auter sa preschenta la situaziun en Grischun. Cun quai ch'il Grischun n'era betg pertutgà da plievgia ferma n’ha l’aura per entant nagina influenza sin la racolta da la verdura di Rolf Hug, il manader dal manaschi puril dal Plantahof.
Cuntrari, normalmain han producentas e producents da verdura en Grischun da cumbatter cun terrain sitg. Quest onn èn las cundiziuns meglras pervi da la plievgia. Uss dentant saja da sperar ch'il Grischun resta era enavant schanegià da malauras e grondas plievgias.
