Siglir tar il cuntegn

Header

cuntegn

Malauras en Svizra Er il livel dal Lai da Neuchàtel sa sbassa uss

En ils blers lieus da la Svizra è il pli grond privel d’aua gronda surmuntà. Tenor l'Uffizi federal da l'ambient vegnian sa sbassan ils livels da tut ils lais en Svizra plaunet.

  • Ils livels d'aua dals Lais da Thun, Bienna e dal Lai dals Quatter Chantuns èn ids enavos las davosas uras. Lucerna avra puspè intginas punts da peduns.
  • Er il livel d'aua dal Lai da Neuchâtel sa sbassa dapi il glindesdi curt avant mezdi. Il glindesdi a bun'ura era anc vegnì observà ch'il livel da quel lai s'auzava – tar tut ils auters lais era il livel gia vi da sa sbassar.
  • Tar il Lai da Thun han las autoritads sbassà il privel d'aua gronda sin il stgalim 4 da 5. Nudar e navigar cun la bartga a vela è puspè lubì. Tar l'Aara a Berna vala da nov il stgalim 3. L'Aara aveva inundà chasas en ils quartiers da Marzili, Altenberg e Matte.
  • La fin d'emna passada e quest'emna duai la situaziun tenor SRF Meteo sa calmar vinavant. Tenor l'Uffizi federal d'ambient tschessan ils livels da l'aua be plaunet. Il privel dad inundaziuns e sbuvaditschs smanatscha vinavant.

Lai da Neuchâtel – Il livel dal lai sa sbassa finalmain

Situaziun al Lai da Neuchâtel.
Legenda: Ad Yverdon-les-Bains hai dà inundaziuns – tranter auter pervia da la bisa che sufla l'aua sin la terra. Keystone

Er ad Yverdon-les-Bains en il chantun Vad sa calma la situaziun plaunet. Il livel dal Lai da Neuchâtel sa sbassa dapi il glindesdi curt avant mezdi finalmain. Il president dad Yverdon-les-Bains, Pierre Dessemontet, va dentant or da quai ch'il livel dal lai vegn a sa sbassar fitg plaun. Almain fin la fin da questa emna vegnia il livel anc ad esser auts. Ma tut en tut saja la situaziun sut controlla, ha ditg Dessemontet il glindesdi davant las medias.

video
Grondas inundaziuns ad Yverdon-les-Bains
Or da Tagesschau dals 17.07.2021.
laschar ir

Lai dals Quatter Chantuns sa sbassa vinavant

A Lucerna aveva il Lai dals Quatter Chantuns cuntanschì il livel critic – la situaziun n'è dentant betg sa pegiurada. Il livel dal lai s'è sbassà vinavant. Glindesdi ha la citad decidì d'avrir puspè intginas punts da peduns sur la Reuss. La punt istorica, la Kapellbrücke, resta dentant vinavant serrada.

Ils bastiments sur il Lai dals Quatter Chantuns na curseschan dentant anc betg – quai almain fin mesemna saira. I vala vinavant il livel da privel d'aua gronda stgalim 5, vul dir fitg grond privel.

A Berna è il Marzili per part stà inundà

Per il flum Aara a Berna vala actualmain in aut privel, stgalim 3 da 5. La sonda è la situaziun en la citad da Berna sa stabilisada, l'Aara maina anc adina fitg bler'aua ed il quartier Marzili è per part inundà. Gia il venderdi èn ils urs vegnids evacuads or dal parc datiers da l'Aara e transportads en lur claus en il foss dad urs.

Grondas sfidas en la Svizra Centrala

En il chantun Zug ha il rempar da la Reuss fatg quitads. Pervia da la blera aua ch'il flum purtava, avess quelpudì rumper, uschia il stab directiv dal chantun. Pertutgada fiss cunzunt la vischnanca Hünenberg stada. En il chantun Sviz han las autoritads stuì serrar la fin da l'emna passada pliras vias pervia da la plievgia. En il chantun Uri aveva il sistem da surveglianza dà alarm suenter ch'intgins craps eran sa tschentads en ina rait. La via e la punt na sajan dentant betg vegnidas donnegiadas.

En il chantun Sursilvania hai pluvì be pauc la fin d'emna, ha communitgà il chantun sin sia pagina dad internet. Al Lai da Sarnen è vegnì cuntanschì il venderdi il livel maximal. Dapi lura sa sbassa il livel da l'aua continuant. La situaziun saja il mument stabila, las mesiras enturn ils lais vegnian dentant mantegnidas. Il privel d'aua gronda e sbuvaditschs exista vinavant.

audio
Discurs cun Marie Louise Werth a Sachseln
06:07 min, RTR Audio dals 17.07.2021.
laschar ir. Durada: 06:07 minutas.

La chantadura Marie Louise Werth viva dapli 30 onns a Sachseln. In vitg gist a la riva dal lai da Sarnen. Tras las malauras è la staziun da Sachseln sut aua e nagins trens passan pli tras il vitg. Sper il traffic public èn er anc pertutgads plirs tschalers ch'ins ha da pumpar ora. Ella sezza na saja betg pertutgada directa, enconuschia dentant amis ed amias ch'hajan da cumbatter cun las auas. I sa tractia en general dad ina situaziun speziala, la glieud emprovia dentant da gidar in a l'auter.

RTR novitads 06:00++

Artitgels legids il pli savens

Scrollar a sanestra Scrollar a dretga