En Svizra duai vegnir construì dapli abitaziuns, cunzunt bunmartgadas. Quai è la finamira d'in plan d'acziun che represchentants da la Confederaziun, chantuns e vischnancas han preschentà oz a Berna.
Pli effizient, proceduras pli spertas
Il plan d'acziun prevesa tranter auter ina meglra utilisaziun dal terren da bajegiar e proceduras da permissiun pli effizientas. In tema è il concentrar – pia dapli persunas sin il medem funs. Ina varianta perquai fiss, dad engrondir chasas existentas. En il plan d'acziun sajan er previsas mesiras per regiuns da turissem.
Ina consequenza da la mancanza d'abitaziuns è ch'ils pretschs s'augmentan. Ina mesira preschentada en il plan d'acziun saja ch'i sto vegnir fatg transparent quant bler che l'anteriur locatari ha pajà per ina abitaziun. Quai duess evitar ch'ils pretschs creschan fermamain.
In ulteriur punct: La construcziun da chasas novas vegn savens retardada pervia da reclamaziuns. Là possian ins agir, per exempel cun evitar ch'in recurs retardescha la construcziun per numerus onns.
Adina dapli glieud
La populaziun en Svizra crescha adina vinavant. Plinavant s'augmenta dapi intgins onns er la surfatscha d'abitar che mintga persuna dovra. Tuttina vegn construì pli pauc. Il 2023 haja dà 30 pertschient damain permissiuns per edifizis novs ch'anc il 2016. En cifras absolutas: L'onn 2018 èn vegnidas sin il martgà var 53'000 abitaziuns, l'onn 2023 be 43'000.
