Siglir tar il cuntegn

Svizra Martin Landolt sustegna Felix e Parolini

Sco la PBD GR, sustegna era il president da la partida burgais-democratica Svizzer, Martin Landolt, vinavant la candidatura dad Andreas Felix per la regenza grischuna. Tenor el na sajan las renfatschas pertutgant las cunvegnas da pretschs envers Felix betg giustifitgadas.

Legende: Audio Bunura: WEKO – reacziun PBD Svizra abspielen. Laufzeit 02:39 Minuten.
02:39 min, Actualitad dals 27.04.2018.

Tenor Martin Landolt na saja la PBD Svizra betg pertutgada da las renfatschas. I sajan renfatschas che n'hajan betg da far cun la politica dals pertutgads, mabain cun la persuna. Perquai na piglia la PBD Svizra betg posiziun en il cas. Martin Landolt sco persuna e president da la partida sustegna dentant cumplettamain ils dus accusads – Andreas Felix sco era a Jon Domenic Parolini. Quai ch'i vegnia pretendì sajan sulettamain renfatschas e nagins fatgs confermads, uschia Landolt.

Landolt resta optimistic per las elecziuns

Martin Landolt deplorescha ch'ils candidats per la regenza grischuna èn vegnids sut squitsch. I saja però in squitsch che na saja betg giustifitgà e perquai na tema el betg da perder tar las elecziuns dals 10 da fanadur en. El è optimistic per omadus candidats.

Jau n'hai naginas raschuns da betg crair ad Andreas Felix ed a Jon Domenic Parolini. Els han mes sustegn cumplain.
Autur: Martin LadnoltPresident BDP Svizra

Era la partida grischuna stat cumplettamain davos ils candidats. Felix saja adina stà loial envers la partida, uschia il manader dal cumbat electoral Gian Michael.

Ils dus candidats per la regenza èn vegnids sut squitsch suenter che la revista online «Republik» ha publitgà divers artitgels davart il cartel da construcziun en l'Engiadina. Quels renfatschan al cusseglier guvernativ Jon Domenic Parolini ed al candidat per la regenza Andreas Felix d'avair savì da las cunvegnas da pretschs.

RR actualitad 06:00