El veglia respectar il giavisch ch'ina dunna duai succeder al cusseglier federal Johann Schneider-Ammann, scriva Martin Schmid en ina communicaziun. Cun la candidatura da Karin Keller-Sutter stettia a disposiziun ina candidata abla e sa cumprovada.
«Il job fiss attractiv, dentant...»
Envers RTR conceda Martin Schmid che las circumstanzas actualas hajan manà a questa decisiun e betg ses interess persunals. Persunalmain haja el l'impressiun dad esser adattà per questa incumbensa. Surtut grazia a sia experientscha sco anteriur cusseglier guvernativ e sco actual cusseglier dals chantuns, avess el gì gust da represchentar ils interess da l'economia e da las regiuns muntagnardas en il Cussegl federal.
El n'haja dentant betg vulì star a disposiziun per gieus politics en l'Assemblea federala. Quella elegia ils 5 da december dus novs commembers ubain duas novas commembras dal Cussegl federal.
I fiss stà malempernaivel sch'jau sco um fiss vegnì elegì enstagl da Karin Keller-Sutter.
El na veglia betg esser quel ch'impedeschia l'elecziun d'ina dunna en il Cussegl federal, di Martin Schmid. Quai fissi era stà malempernaivel per sia partida. Che la PLD haja fatg squitsch da desister, na lascha Martin Schmid betg valair explicitamain.
Martin Schmid numna enstagl era raschuns famigliaras che hajan influenzà sia decisiun. Il giurist è bab da trais uffants en la vegliadetgna da trais, quatter ed otg onns.
RR novitads 11:00
