«Hallo, jau sun Elias Smith da Universal Job SA. Nus avain il mument bleras plazzas libras, dastgain ussa trametter intginas infurmaziuns en chaussa?» Uschia u sumegliantamain sa cloman las novitads che cugliunaria derasa en rotschas sur Whatsapp e Telegram, ma era via medias socialas.
Las persunas interessadas duain sa registrar sin ina plattafurma e valitar hotels, electronica, mobiglias ed apps ubain recumandar products. Per mintga recumandaziun survegnan ellas ed els bun in pèr raps provisiun sin in «conto» supponì. Fin 15'000 francs poss'ins gudagnar uschia mintga mais, empermetta la cugliunaria ad in auditur dal magazin da consuments dad SRF «Espresso». La situaziun finanziala dal nov pensiunà n'è betg buna, perquai è el sa laschà en sin l'offerta.
Tge che capita cun sia lavur, n'ha l'auditur betg ponderà. L'emprim mument na fa el era betg memia bleras ponderaziuns en chaussa.
Empè da gudagnar, duain las victimas tuttenina pajar
Ma lura è il conto supponì da l'auditur tuttenina bloccà ed en il minus. Per gudagnar ulteriurs raps stuess el egualisar il minus e pajar raps sin il conto, hai num. «Jau hai immediat dumandà mia persuna da contact, tge che capita qua. El ha respundì che quai saja dapertut uschia», raquinta il pertutgà.
Il sistem è perfid. Duas giada ha il pensiunà perfin survegnì daners. El ha dentant pajà anc dapli, ch'el ha survegnì. Fin 2'000 francs ha el pajà per puspè pudair «lavurar». Insacura va el tar la polizia.«Gea, jau sun stà in pau naiv», di il pertutgà. Igl è in sistem perfid che gioga cun il fatg che la glieud ha memia bler temp u memia paucs daners, u tuts dus ensemen.
Jau hai lavurà durant mia entira vita da lavur ed hai gì lungurella sco pensiunà. Jau hai pensà che gudagnar in pau occupaziun e gudagnar in pau daners fiss bun.
Er auters pertutgads s'annunzian en il magazin per consuments da SRF. Quels han dentant per fortuna remartgà anc ad uras la mascha.
Polizia avertescha
Era la pagina d'internet cybercrimepolice.ch da la Polizia chantunala da Turitg avertescha dapi l'entschatta da settember da la mascha. «Ils burgais e las burgaisas fun cun da buna fai e pensan ch'i sajan raps bain meritads», di il pledader Marc Besson.
Sche las valitaziuns fatgas èn realas u sche l'entir è mo ina farsa per fatschentar las victimas n'è betg cler. Ni «Espresso» ni las persunas pertutgadas han chattà ina valitaziun sut lur num en l'internet. Tuttina avertescha Marc Besson da consequenzas giuridicas. Cun valitaziuns fallidas en l'internet sa movi'ins en ina zona grischa, i possia schizunt esser chastiabel.
