Siglir tar il cuntegn

Header

Maletg cun bleras mascras da protecziun
Legenda: Surtut persunal medicinal dovra mascras dal tip FFP3. Keystone
cuntegn

Mascras, mascras, mascras Dapli protecziun e dapli perscrutaziun

Igl è IL tema ch'occupa la Svizra il mument, schegea ch'il Cussegl federal n'ha relaschà nagin obligatori: Las mascras da protecziun. En il chantun Son Gagl vegn producì mascras en massa ed era la perscrutaziun vul dar gas, per exempel cun mascras reutilisablas.

Mascras made in Son Gagl

A Flawil en il chantun Son Gagl duai vegnir producì timordio mascras da protecziun e quai en ina firma che producescha normalmain products da vatta. Mesemna saira èn arrivadas sin l'eroport Turitg duas maschinas per producir talas mascras. Las duas maschinas ord la China vegnan installadas ils proxims dis, sco la Confederaziun scriva.

Las maschinas duain esser prontas sin circa mez matg. A partir da lura èsi previs da producir mintga di fin 100'000 mascras dal tip FFP2 che vegnan duvradas en spezial en ospitals. Cumprà las duas maschinas han la Confederaziun ed il chantun Turitg. Els partan er ils custs da radund 800'000 francs per maschina.

«ReMask» – mascras reutilisablas

Actualmain cusseglia l'Uffizi federal da sanadad da duvrar be ina giada ina mascra e lura dismetter ella en il rument. L'Institut federal da controlla da material e da perscrutaziun EMPA perscrutescha dentant mascras reutilisablas – era per cumbatter la mancanza da mascras. Participads al project cun il num «ReMask» sajan perscrutaders da l'EMPA, da las scolas politecnicas federalas da Turitg e Losanna, dal labor Spiez sco er partenaris da la branscha da sanadad e da l'industria, hai num en ina communicaziun. La finamira saja d'equipar la Svizra cun material da protecziun effizient.

RTR novitads 22:00

Artitgels legids il pli savens

Scrollar a sanestra Scrollar a dretga