Siglir tar il cuntegn

Header

Ina persuna smanatscha in'autra persuna.
Legenda: 25 persunas mortas ad onn – en Svizra moran en media 25 persunas l'onn pervi da violenza a chasa. Keystone
cuntegn

Svizra Meglra protecziun per unfrendas da violenza e stalking

Delinquents pon tranter auter vegnir survegliads cun chadainas electronicas.

Davent da la stad da l'auter onn èn victimas da violenza a chasa e da stalking protegidas meglier. Il Cussegl federal ha decidì la mesemna da metter en vigur la lescha ch'il Parlament federal ha decidì l'enviern passà.

Protecziun cunter squitsch dad accusads

Quella prevesa per exempel ch’ina procedura penala cunter ina persuna violenta na sto betg pli vegnir sistida perquai che l'unfrenda pretenda quai. En l'avegnir duai la procura publica era dastgar decider da cuntinuar cun las investigaziuns, sch'ella manegia che quai saja necessari. Quai duai reducir il privel che l'unfrenda vegn messa sut squitsch da la persuna accusada.

Plinavant duain las autoritads penalas era pudair pretender dal delinquent da frequentar in program da scolaziun cunter la violenza.

Controlla pli severa da delinquents

In auter punct che vegn megliurà è la surveglianza da persunas violentas. La dretgira po uss decider che delinquents pon vegnir survegliai cun chadainas electronicas – quai per pudair verifitgar, sch'els sa tegnan vid scumonds da contact. Per dar als chantuns avunda temp per adattar lur organisaziun entran las mesiras per la surveglianza electronica pir en vigur il 2022.

RR novitads 12:00