En Svizra èn las stretgas cun il provediment cun medicaments d'impurtanza vitala s'intensivadas. La Confederaziun classifitgescha da nov la situaziun sco «problematica», sco ch'il Cussegl federal ha communitgà mesemna. Ina gruppa d'experts duai examinar mesiras immediatas.
Las stretgas pertutgan pli e pli fitg ils medicaments ch'ins sto prender a moda orala. Auter ch'ils onns avant, nua ch'ils ospitals èn stads pertutgads da stretgas, mancan ils medicaments uss per exempel er en las apotecas u praticas da medis.
Pegiurament dapi onns
La situaziun da provediment en cas da medicaments sa pegiurescha tenor il Cussegl federal dapi plirs onns. La mancanza actuala per exempel d’antibiotica saja dentant anc vegnida mendra entras la pandemia da corona ed ils lockdowns en China.
La taskforce ch’è sut la direcziun da Kurt Rohrbach, delegà per il provediment economic dal pajais, duai ussa chattar mesiras che levgeschan las stretgas.
