La puraglia svizra duai vinavant producir passa la mesadad da las mangiativas. Grazia al progress tecnic duai la productivitad però vegnir augmentada per la mesadad e las emissiuns da gas da serra duain esser almain per 40% sut quellas dal 1990.
En sia strategia dal futur numna il Cussegl federal perquai quatter miras:
- I va per duvrar l'aua ed il terren cun quità, tegnair en egl ils effects da la midada dal clima e tuttina tegnair stabil las chadainas da furniziun
- Sco segund duai la producziun esser amiaivel al clima, a l'ambient ed als animals. Puras e purs duajan augmentar la producziun d'energia regenerabla, far attent che pli pauc perditas da substanza nutritiva va or en l'ambient e reducir las ristgas cun duvrar pesticid.
- Sco terz duai la valurisaziun persistenta vegnir pli ferma. L'agricultura duai vegnir pli cumpetitiv ed ils novs trends, co per exempel che la dumonda suenter la charn vegn pli bassa, duai vegnir utilisada pro-activ.
- E per la quarta mesira sajan las consumentas ed ils consuments responsabels. Ellas ed els duajan esser infurmads sur da las metodas da producziun e savair tge effects ch'ellas han sin il clima. Vinavant stoni mirar ch'i mangian saun e na betg sfarlattar mangiativas ch'èn anc bunas.
Reacziuns sin la strategia dal Cussegl federal
Areguard las propostas dal Cussegl federal, per la politica agrara futura – pretendan cunzunt organisaziuns per la protecziun da l'ambient ed ils Verds da surlavurar las propostas. Bain saja la direcziun buna, la strategia restia dentant diffusa. L'Uniun purila svizra e la PLD sa mussan per la plipart cuntents cun las propostas dal Cussegl federal. Dapli paisa dovria dentant per la producziun indigena da mangiativas, scriva l'uniun purila en ina communicaziun.
