L’administraziun federala vul sbassar sias emissiuns da gas cun effect da serra. Il Cussegl federal ha decis la mesemna in uschenumnà «pachet da clima». Quel cuntegn mesiras per sgular, ir cun l'auto e tar il diever dad energia tar bajetgs. Per la ministra per l'ambient svizra è cler
La midada dal clima è arrivada en il mintga di.
Quai sentia era la populaziun. En consequenza stoppian tuts sbassar lur emissiuns da gas cun effect da serra – er la Confederaziun. Fin il 2030 duai l’administraziun federal daventar neutrala al clima.
Las finamiras èn ambiziusas
L'administraziun federala civila e sias unitads decentralas sco la scolas federalas politecnicas ETH hajan da reducir lur emissiun fin il 2030 sin 50% – quai en relaziun cun sias emissiuns 2006.
Il militar n'ha betg da far tanta prescha: El ha da reducir sias emissiuns fin il 2030 be per 35% – en relaziun cun sias emissiuns il 2001 e malgrà ch'el causescha las pli grondas emissiuns da CO2 tar l'administraziun federala.
Il rest duai vegnir cumpensà a l'exteriur – per part
Las emissiuns da CO2, ch'ella causescha lura anc, hajan da vegnir cumpensadas cun cumprar certificats dad emissiuns en l'exteriur, fa a savair la cussegliera federala Sommaruga en sia conferenza da medias. Vegnir cumpensada dastgia dentant vegnir be ina part, ch'il Cussegl federal definescha.
RR novitads 14:00
