La midada dal clima. La Svizra è pertutgada spezialmain da las consequenzas. Sco quai che la scienza mussa creschan las temperaturas tar nus dubel uschè fitg sco en la media mundiala. La consequenza: dapli e pli fermas precipitaziuns, auas grondas, sitgiras u era bovas e crudadas da crappa.
Per preparar la Svizra sin questas consequenzas ha la Confederaziun lantschà avant 10 onns in program da pilot. Avant paucs dis ha l’Uffizi federal d’ambient preschentà a Berna passa 50 projects ch’èn vegnids elavurads durant quest temp e che duain far pronta la Svizra per las sfidas ch’èn per part gia da vesair.
Dapli lavur da mantegniment
In da quels projects ha elavurà ina strategia per ils gestiunaris da las sendas da viandar. Per che l'infrastructura da viandar restia accessibla era suenter l’onn 2040 senza privel, stoppian tschertas adattaziuns vegnir fatgas, di Peter Marty da la Scol’auta turitgaisa per scienzas applitgadas (ZHAW) a Wädenswil. Quai saja dentant collià cun custs e pretendia era dapli resursas. I saja perquai impurtant da sclerir ils basegns ed era las responsabladads. En la responsabladad vesa Marty dentant era tut las persunas che frequentan las sendas da viandar. I saja il futur anc pli impurtant d’esser equipà bain e da valitar a moda correcta ils ristgs dad ina tura.
Link tar il project
Reservuar artifizial multifuncziunal
Martin Maron da la Flims Electric ha preschentà il project per far frunt a la mancanza d’aua en las regiuns nua ch’ils glatschers lieuan. Cun engrondir il lai da Nagens en il territori da skis da Laax vulan els crear in reservuar per l’aua che po vegnir duvrada a moda differenta. Per ennavar las pistas ma era per magasinar l’electricitad fotovoltaica da clients cun tals indrizs. Durant il di vegn l’aua pumpada en il lai, la notg pon ils clients lura puspè retrair l’energia. Gia l’auter onn duain ils emprims clients testar la tecnica.
Link tar il project
Far fitta l’agricultura
Problems pervi da la mancanza d’aua ha era l’agricultura. Da simplamain sauar cun l’aua or dal flum n’è il futur betg pli pussaivel. Samuel Zahner dal biro da cussegliaziun Ecoplan ha elavurà per il chantun Argovia in project che duai gidar als purs da la regiun Bünztal da s’adattar a la mancanza. Ina proposta è da semnar il futur dapli culturas che dovran damain aua u che creschan cura ch’i na dat nagina mancanza d’aua. Sper quai dovria era dapli infurmaziuns davart la situaziun dal terren. Sensurs che mesiran cuntinuadamain l'umiditad possian qua per exempel evitar ch’i vegn sauà memia bler.
Link tar il project
