Entaifer ils ultims diesch onns sajan s’augmentads ils donns assicurads che l’aura extrema ha chaschunà. Quai ha ditg Sergio Ermotti, il president dal cussegl d’administraziun dal re-assicurader «Swiss Re» envers la «NZZ am Sonntag». Ultra da quai haja er dà ina accumulaziun da valurs da facultad en regiuns che sajan exponidas, sco per exempel la California. Concret sajan ils donns assicurads s’augmentads mintg’onn per 5 enfin 7% durant l’ultim decenni.
Consequenzas fatalas – betg mo per l'economia globala
El partia dal fatg che quest trend vegnia a cuntinuar – quai pervi da la midada dal clima. Sche la temperatura globala creschia en media per 3,2 grads fin il 2050 custia quai l’economia mundiala fin a 18%, stima l’anteriur schef da la banca gronda UBS. Las consequenzas sajan dentant anc pli fatalas: Tschient millis da umans che tutgan ozendi anc tar la classa mesauna, perdessan lur existenza e vivessan en povradad. La consequenza fissan tensiuns socialas ed undas da fugitivs.