Il Cussegl federal na sto betg mo rinforzar las controllas als cunfins, mabain sto el era guardar che persunas senza documents valaivels e che n'han fatg nagina dumonda d'asil na pon betg entrar en la Svizra.
Tenor la communicaziun dal Cussegl federal duain 300 ulteriuras collavuraturas e collavuraturs da l'Uffizi federal da dazis e da segirezza da cunfin vegnir engaschads per la controlla da persunas. Spezialistas da dazis duain survegnir ils dretgs d'access necessaris per ils sistems d'investigaziun e d'informaziun relevants.
Instruments per la surveglianza electronica en examinaziun
Era sch'i vegn a dar controllas pli intensivas als cunfins svizzers, duai il traffic da persunas e da commerzi sur ils cunfins tuttina cuntinuar uschè bain sco pussaivel, constatescha il Cussegl federal. L'Uffizi federal da dazis e da segirezza da cunfin vul sa coordinar cun ils chantuns, cun ils corps da polizia e cun auters partenaris, per pudair trametter davent immigrants u persunas che n'han nagin dretg da dimora. Las patruglias maschadadas ed il barat d'infurmaziuns cun ils stadis vischins duain era vegnir schlargiads.
A media vista vuless la Confederaziun examinar e realisar in schlargiament d' instruments tecnics per la surveglianza electronica. Vinavant duain persunas spezialisadas da dazis era surpigliar incumbensas che vegnan normalmain fatgas da las guardias da cunfin.