Durant 20 onns (1992 – 2012) è Roland Jeanneret stà la vusch e la fatscha da la Chadaina da Fortuna en la Svizra tudestga. En ses post sco responsabel per la communicaziun ha el manà diversas acziuns da rimnada al success. Perquai vegniva el savens er titulà en las medias sco «mister Chadaina da Fortuna».
Cumenzà tar la televisiun e fatg carriera tar il radio
Suenter il studi da litteratura tudestga, publicistica e scienzas da teater a l'universitad da Berna ha el cumenzà tar la televisiun svizra. Quai sco preschentader da las novitads d'uffants. Da là ha Jeanneret midà tar il radio, nua ch'el è stà 18 onns part da l'emissiun Rendezvous e daventà enconuschent sco moderatur e manader da la redacziun.
Grond'attenziun ha el er survegnì per sias acziuns da stad spezialas al radio. Sco per exempel «Diretissima Schweiz» (1983), nua che quatter alpinists han traversà la Svizra da l'ost en il vest, exact sin il kilometer 160, accumpagnads stretgamain dals reporters da radio. Per questa producziun ha el er survegnì il premi da radio da Turitg.
Autur, fotograf e docent
Sper sia lavur sco redactur e moderatur da radio ha Roland Jeanneret er scrit divers cudeschs, per exempel davart meteorologia, agid umanitar u era cuntegns per emprendistas ed emprendists. Plinavant è el stà 22 onns docent a la scola da schurnalissem MAZ a Lucerna ed è s'engaschà en differentas uniuns schurnalisticas.
En ses temp liber ha el fotografà cun gronda passiun. Era è el viagià professiunalmain e privat per l'entir mund enturn – dals Stadis Unids, sur l'Europa fin en il Giapun u la Sibiria. Per ses engaschament umanitar internaziunal è el vegnì undrà cun la medaglia Henry-Dunant e l'onn 1999 ha el survegnì il premi internaziunal per dretgs umans.
